নৱেম্বৰৰ পৰা শিশুবিবাহৰ বিৰুদ্ধে এমাহজোৰা কঠোৰ অভিযান

১ নৱেম্বৰৰ পৰা এমাহজোৰা অভিযান
২০২১ৰ পৰা ১২,১৯৪টা গোচৰ পঞ্জীয়ন
১১,০৯৯জনক গ্ৰেপ্তাৰ কৰাৰ তথ্য
চৰকাৰী কৰ্মচাৰীৰ দৰমহা কৰ্তনৰ প্ৰস্তাৱ

সমগ্ৰ সমাচাৰ সেৱা

গুৱাহাটী, ২৯ ছেপ্টেম্বৰ: অসমত শিশুবিবাহ ৰোধৰ বাবে অহা ১ নৱেম্বৰৰ পৰা এমাহজোৰা বিশেষ অভিযান চলোৱাৰ কথা ঘোষণা কৰিছে মুখ্যমন্ত্ৰী হিমন্ত বিশ্ব শৰ্মাই। স্বাধীনতা দিৱসৰ ভাষণত মুখ্যমন্ত্ৰীগৰাকীয়ে আৰক্ষীক শিশুবিবাহৰ বিৰুদ্ধে কঠোৰ অভিযান চলোৱাৰ নিৰ্দেশ দিয়াৰ কথা প্ৰকাশ কৰিছিল।

২০২১ৰ পৰা অব্যাহত অভিযান

মুখ্যমন্ত্ৰীৰ বক্তব্য অনুসৰি, ২০২১ চনত শিশুবিবাহ বন্ধ কৰাৰ লক্ষ্যৰে অভিযান আৰম্ভ কৰাৰ পিছত এতিয়ালৈকে ১২,১৯৪টা শিশুবিবাহৰ গোচৰ পঞ্জীয়ন কৰা হৈছে আৰু এই গোচৰসমূহৰ সৈতে জড়িত ১১,০৯৯জনক গ্ৰেপ্তাৰ কৰা হৈছে। এই অভিযানৰ ফলত ছোৱালীৰ উচ্চশিক্ষাত অংশগ্ৰহণো বৃদ্ধি পোৱা বুলি তেওঁ উল্লেখ কৰে।

নৱেম্বৰৰ পৰা এমাহজোৰা অভিযান

শিশুবিবাহৰ বিৰুদ্ধে আৰক্ষীয়ে অহা ১ নৱেম্বৰৰ পৰা এমাহ ধৰি কঠোৰ অভিযান চলাব। চৰকাৰৰ লক্ষ্য হৈছে শিশুবিবাহৰ ঘটনা প্ৰতিৰোধ কৰাৰ লগতে আইন উলংঘনৰ ক্ষেত্ৰত ব্যৱস্থা গ্ৰহণ কৰা। মুখ্যমন্ত্ৰীয়ে অভিযানটোত কোনো ধৰণৰ শিথিলতা নৰখাৰ নিৰ্দেশ দিয়াৰ কথা কয়।

চৰকাৰী কৰ্মচাৰীৰ বাবেও নতুন ব্যৱস্থাৰ ঘোষণা

ইফালে, বিবাহ বিচ্ছেদ নকৰাকৈ পত্নীক এৰি আন এগৰাকী মহিলাৰ সৈতে অনানুষ্ঠানিকভাৱে সংসাৰ পাতিলে চৰকাৰী কৰ্মচাৰীৰ দৰমহাৰ ২০ শতাংশ কৰ্তন কৰি সেই ধন এৰি যোৱা পত্নীৰ বেংক একাউণ্টত জমা দিয়াৰ ব্যৱস্থা কৰাৰ কথা মুখ্যমন্ত্ৰীয়ে ঘোষণা কৰে। এই প্ৰস্তাৱিত ব্যৱস্থাৰ পৰিসৰ ব্যক্তিগত খণ্ডৰ কৰ্মচাৰীলৈও সম্প্ৰসাৰণ কৰাৰ পৰিকল্পনা চৰকাৰৰ আছে বুলি তেওঁ কয়।