অসমত কাম পলম কৰা ঠিকাদাৰক ক’লা তালিকাভুক্ত কৰাৰ নিৰ্দেশ মন্ত্ৰী অশ্বিনী ৰায় সৰকাৰৰ
সমগ্ৰ সমাচাৰ সেৱা
গুৱাহাটী, ২৮ আগষ্ট: নিৰ্ধাৰিত সময়সীমাৰ ভিতৰত চৰকাৰী প্ৰকল্পৰ কাম সম্পূৰ্ণ কৰাত ব্যৰ্থ হোৱা ঠিকাদাৰসকলক ক’লা তালিকাভুক্ত কৰাৰ নিৰ্দেশ দিছে অসমৰ মাটি সংৰক্ষণ মন্ত্ৰী অশ্বিনী ৰায় সৰকাৰে। বৃহস্পতিবাৰে বিভাগটোৰ বিভিন্ন আঁচনি আৰু প্ৰকল্পৰ অগ্ৰগতি পৰ্যালোচনা কৰি অনুষ্ঠিত এখন বৈঠকত মন্ত্ৰীগৰাকীয়ে এই নিৰ্দেশ দিয়ে।
বৈঠকত বিভিন্ন প্ৰকল্পৰ ৰূপায়ণৰ অৱস্থা, অসম্পূৰ্ণ কাম আৰু সময়মতে কাম সম্পূৰ্ণ কৰাত সৃষ্টি হোৱা সমস্যাসমূহৰ বিষয়ে পৰ্যালোচনা কৰা হয়।
চৰকাৰী ধনৰ ব্যৱহাৰত স্বচ্ছতা আৰু জবাবদিহিতাৰ ওপৰত গুৰুত্ব
মন্ত্ৰীগৰাকীয়ে চৰকাৰী ধনৰ সঠিক আৰু ফলপ্ৰসূ ব্যৱহাৰৰ ওপৰত বিশেষ গুৰুত্ব আৰোপ কৰে। প্ৰতিটো প্ৰকল্প ৰূপায়ণৰ ক্ষেত্ৰত স্বচ্ছতা, কামৰ গুণগত মান আৰু জবাবদিহিতা নিশ্চিত কৰিবলৈ বিষয়াসকলক নিৰ্দেশ দিয়ে।
ৰাজহুৱা ধনৰ ব্যৱহাৰত কোনো ধৰণৰ গাফিলতি সহ্য কৰা নহ’ব বুলিও তেওঁ সতৰ্ক কৰি দিয়ে। নিৰ্ধাৰিত সময়সীমা উকলি যোৱাৰ পাছতো কাম সম্পূৰ্ণ নকৰা ঠিকাদাৰৰ বিৰুদ্ধে নিয়ম অনুসৰি কঠোৰ ব্যৱস্থা গ্ৰহণ কৰিবলৈ তেওঁ বিষয়াসকলক নিৰ্দেশ দিয়ে।
জনস্বাৰ্থত বিভাগীয় কাম ত্বৰান্বিত কৰাৰ আহ্বান
কৰ্তব্যত গাফিলতি আৰু অতিৰিক্ত বিলম্বৰ বাবে প্ৰয়োজন অনুসৰি এনে ঠিকাদাৰক ক’লা তালিকাভুক্ত কৰিবলৈও মন্ত্ৰীগৰাকীয়ে নিৰ্দেশ দিয়ে।
জনসাধাৰণৰ সুবিধাৰ্থে সকলো আঁচনি আৰু প্ৰকল্প সময়মতে সম্পূৰ্ণ কৰাৰ লক্ষ্যৰে বিভাগীয় কাম-কাজ অধিক ত্বৰান্বিত কৰাৰ ওপৰতো বৈঠকত গুৰুত্ব আৰোপ কৰা হয়।
মন্ত্ৰী অশ্বিনী ৰায় সৰকাৰে কয় যে জনস্বাৰ্থত বিভাগীয় কাম-কাজত সময়ানুবৰ্তিতা, স্বচ্ছতা আৰু জবাবদিহিতা নিশ্চিত কৰাটোৱেই চৰকাৰৰ মূল উদ্দেশ্য।
About The Author
