সন্ধানহীন পুত্ৰক বিচাৰি সেতুত অনশন, আৰক্ষীৰ জিম্মাত বৃদ্ধ দম্পতী
সমগ্ৰ সমাচাৰ সেৱা
গুৱাহাটী, ২৫ আগষ্ট: প্ৰায় দুমাহ ধৰি সন্ধানহীন হৈ থকা একমাত্ৰ পুত্ৰৰ সন্ধান উলিয়াব নোৱাৰাৰ অভিযোগ তুলি সোমবাৰে কুমাৰ ভাস্কৰ বৰ্মা সেতুত অনশনত বহিল বৃদ্ধ দম্পতী। পুত্ৰৰ সন্ধান আৰু কৰ্তৃপক্ষৰ জবাবদিহিতা দাবী কৰি সুৰেন ৰাজবংশী আৰু তেওঁৰ পত্নীয়ে গুৱাহাটী-উত্তৰ গুৱাহাটী সংযোগী সেতুখনত প্ৰতিবাদ সাব্যস্ত কৰে। পিছত গুৱাহাটী আৰক্ষীয়ে দুয়োকে থানালৈ নি সোধা-পোছা কৰে।
ভৰালু থানাৰ ভাৰপ্ৰাপ্ত বিষয়াই জনোৱা মতে, দম্পতীহালক বৰ্তমান আৰক্ষীয়ে সোধা-পোছা কৰি আছে আৰু বিষয়টোৰ তদন্ত অব্যাহত আছে।
২৯ জুনৰ নিশাৰ পৰা সন্ধানহীন সুৰজিত
সুৰজিত ৰাজবংশী আৰ.জি. বৰুৱা মহাবিদ্যালয়ৰ চতুৰ্থ ষাণ্মাসিকৰ বি.এ.ৰ ছাত্ৰ আছিল। পঢ়াশোনাৰ সমান্তৰালভাৱে তেওঁ Blinkit-ৰ ডেলিভাৰী এজেণ্টো হিচাপে কাম কৰিছিল। পৰিয়ালৰ মতে, ২৯ জুনৰ নিশাৰ পৰা তেওঁৰ কোনো সন্ধান নাই।
আৰক্ষীয়ে আটক কৰাৰ পূৰ্বে সুৰেনে কয় যে পুত্ৰ এতিয়া জীয়াই নথকাৰ আশংকা তেওঁৰ মনত সৃষ্টি হৈছে। তেওঁৰ মতে, সেই নিশা সুৰজিত চেগুনবাৰী-শিৱানন্দপুৰ অঞ্চলত দুজন বন্ধুৰ সৈতে আছিল। নিশা মাতৃয়ে ফোন কৰাত তেওঁ আধা ঘণ্টাৰ ভিতৰতে ঘৰলৈ উভতি অহাৰ কথা জনাইছিল। পিতৃৰ মতে, নিশা প্ৰায় ১ বাজি ৩৪ মিনিটতো পুনৰ ফোন কৰাত সুৰজিতে একেই আশ্বাস দিছিল। কিন্তু তেওঁ আৰু ঘৰলৈ উভতি নাহিল।
পিছদিনা পুৱা পৰিয়ালটোৱে পথৰ কাষত সুৰজিতৰ মটৰচাইকেল আৰু হেলমেট পৰিত্যক্ত অৱস্থাত উদ্ধাৰ কৰে বুলি সুৰেনে জানিবলৈ দিয়ে। পৰিয়ালটোৱে সংগ্ৰহ কৰা চিচিটিভি ফুটেজত সুৰজিতক নিশা প্ৰায় ১ বাজি ৫৫ মিনিটত কুমাৰ ভাস্কৰ বৰ্মা সেতুৰ দিশে যোৱা দেখা গৈছিল বুলি তেওঁ দাবী কৰে।
সুৰেনে অভিযোগ কৰে যে সেতুৰ চিচিটিভি ফুটেজ থকাৰ পিছতো তেওঁৰ পুত্ৰৰ মৃতদেহ আজিলৈ উদ্ধাৰ কৰিব পৰা নাই। প্ৰশাসনৰ ওচৰত বাৰে বাৰে দৌৰি ভাগৰি পৰাৰ কথাও তেওঁ প্ৰকাশ কৰে।
বন্ধুসকল আৰু আন এগৰাকীৰ ভূমিকাক লৈ প্ৰশ্ন
পুত্ৰৰ সন্ধানহীনতাৰ ঘটনাক লৈ সুৰেনে সেই নিশা তেওঁৰ সৈতে থকা দুজন বন্ধুৰ ভূমিকা সন্দৰ্ভতো প্ৰশ্ন উত্থাপন কৰে। লগতে পৰিয়ালটোৱে এগৰাকী মহিলাৰো ঘটনাটোৰ সৈতে সম্পৰ্ক থাকিব পাৰে বুলি সন্দেহ প্ৰকাশ কৰিছে। অৱশ্যে এই সন্দেহসমূহৰ সত্যতা তদন্তৰ জৰিয়তেহে স্পষ্ট হ’ব।
পৰিয়ালে প্ৰথমে ফটাশিল আমবাৰী থানাত সন্ধানহীনতাৰ গোচৰ ৰুজু কৰিছিল। পৰৱৰ্তী সময়ত তিনিজন লোক—আছিমি চাংমা, মিত্ৰদেৱ কোঁৱৰ আৰু সনৎ কুমাৰ দাসৰ নাম উল্লেখ কৰি অধিক বিস্তৃত তদন্তৰ দাবী জনাই অভিযোগ দাখিল কৰা বুলি সুৰেনে কয়।
সেতুত নিয়োজিত নিৰাপত্তাৰক্ষীয়ে পুৱতি নিশা সুৰজিতৰ উপস্থিতি লক্ষ্য কৰিও কিয় কোনো পদক্ষেপ লোৱা নাছিল বা তেওঁক সোধা-পোছা কৰা নাছিল, সেই প্ৰশ্নও উত্থাপন কৰে পিতৃয়ে। আৰক্ষীয়ে তেওঁক বাহনত উঠাই নিয়াৰ সময়ত সুৰেনে কয়, “মই দুমাহ ধৰি মোৰ মৃত পুত্ৰৰ মৃতদেহটোও দেখা নাই। মোক ন্যায় লাগে।”
ইফালে, শোকত ভাগি পৰা সুৰজিতৰ মাতৃয়ে কৰ্তৃপক্ষক পুত্ৰক বিচাৰি উলিয়াবলৈ কাতৰ আহ্বান জনায়। তেওঁ কয় যে সুৰজিত তেওঁলোকৰ একমাত্ৰ সন্তান আৰু তেওঁৰ শিক্ষাৰ বাবে পৰিয়ালটোৱে বহু কষ্ট কৰিছিল। ২৯ জুনৰ নিশা ফোনত সুৰজিতে ঘৰৰ ওচৰত থকাৰ কথা জনোৱাৰ পিছতে তেওঁৰ ফোন বন্ধ হৈ যোৱা বুলি মাতৃয়ে জানিবলৈ দিয়ে। পুত্ৰক বিচাৰি উলিওৱাৰ বাবে কৰ্তৃপক্ষই সকলো প্ৰয়োজনীয় ব্যৱস্থা গ্ৰহণ কৰিব লাগিব বুলিও তেওঁ দাবী কৰে।
About The Author
