গুৱাহাটীৰ পৰা ডুবাই আৰু আবুধাবিলৈ পোনপটীয়া বিমান সেৱা আৰম্ভ

৪ আগষ্ট ২০২৬ৰ পৰা গুৱাহাটীৰ পৰা ডুবাই আৰু আবুধাবিলৈ এয়াৰ ইণ্ডিয়াৰ পোনপটীয়া বিমান সেৱা আৰম্ভ।
মুখ্যমন্ত্ৰী ড° হিমন্ত বিশ্ব শৰ্মাই এই ঘোষণা কৰি অসমৰ বাবে এক গুৰুত্বপূৰ্ণ মাইলৰ খুঁটি বুলি অভিহিত কৰে।
গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ সৈতে সংযুক্ত দেশৰ সংখ্যা চাৰিলৈ বৃদ্ধি পাব।
ইউএই, থাইলেণ্ড, ছিংগাপুৰ আৰু ভূটানলৈ পোনপটীয়া সংযোগ লাভ কৰিব গুৱাহাটী।
পৰ্যটন, ব্যৱসায়-বাণিজ্য, বিনিয়োগ আৰু জন-জনৰ সম্পৰ্ক অধিক শক্তিশালী হোৱাৰ সম্ভাৱনা।
ভিয়েটনামলৈও পোনপটীয়া বিমান সেৱা আৰম্ভ কৰাৰ লক্ষ্য চৰকাৰৰ।

আন্তঃৰাষ্ট্ৰীয সংযোগত নতুন দিগন্ত

সমগ্ৰ সমাচাৰ সেৱা
গুৱাহাটী, ২৩ জুনঃ অসমৰ ৰাজধানী গুৱাহাটীয়ে আন্তঃৰাষ্ট্ৰীয় বিমান সংযোগৰ ক্ষেত্ৰত এক নতুন অধ্যায়ত প্ৰৱেশ কৰিবলৈ ওলাইছে। ২০২৬ চনৰ ৪ আগষ্টৰ পৰা এয়াৰ ইণ্ডিয়াই গুৱাহাটীৰ পৰা ডুবাই আৰু আবুধাবিলৈ পোনপটীয়া বিমান সেৱা আৰম্ভ কৰিব। এই ঘোষণা মুখ্যমন্ত্ৰী ড° হিমন্ত বিশ্ব শৰ্মাই জনাই কয় যে, এই পদক্ষেপে গুৱাহাটীক দক্ষিণ-পূব এছিয়া আৰু উপসাগৰীয় অঞ্চলৰ এক গুৰুত্বপূৰ্ণ যাতায়াত আৰু ট্ৰানজিট হাব হিচাপে গঢ়ি তোলাত সহায় কৰিব।

চাৰিখন দেশলৈ পোনপটীয়া সংযোগ
নতুন বিমান সেৱা আৰম্ভ হোৱাৰ পাছত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰে ইউএই, থাইলেণ্ড, ছিংগাপুৰ আৰু ভূটানকে ধৰি চাৰিখন দেশৰ সৈতে পোনপটীয়া বিমান সংযোগ লাভ কৰিব। ইয়াৰ ফলত আন্তঃৰাষ্ট্ৰীয় ভ্ৰমণ অধিক সহজ আৰু সুবিধাজনক হ’ব।

পৰ্যটন আৰু বাণিজ্যৰ ক্ষেত্ৰত নতুন সুযোগ
বিশেষকৈ উপসাগৰীয় দেশসমূহৰ সৈতে উন্নত বিমান সংযোগে পৰ্যটন, ব্যৱসায়-বাণিজ্য, বিনিয়োগ, কৰ্মসংস্থাপন আৰু জন-জনৰ সম্পৰ্ক অধিক মজবুত কৰাৰ আশা কৰা হৈছে। ব্যৱসায়ী, শিক্ষাৰ্থী, পৰ্যটক আৰু প্ৰবাসী ভাৰতীয়সকলৰ বাবেও এই পদক্ষেপ বিশেষ লাভজনক হ’ব।

অসমৰ বিশ্বমুখী যাত্ৰাৰ আন এক মাইলৰ খুঁটি
শেহতীয়াকৈ ইউৰোপীয় সংঘৰ কেইবাখনো সদস্য ৰাষ্ট্ৰই অসম সম্পৰ্কীয় ভ্ৰমণ পৰামৰ্শৰ নিষেধাজ্ঞা শিথিল কৰাৰ পিছতে এই ঘোষণা আহিছে। ইয়াৰ পূৰ্বেও অষ্ট্ৰেলিয়া আৰু জাপানে একেধৰণৰ ইতিবাচক সংশোধন কৰিছিল। এই উন্নয়নসমূহে অসমৰ আন্তঃৰাষ্ট্ৰীয় ভাবমূৰ্তি অধিক শক্তিশালী কৰাৰ লগতে বিশ্বৰ সৈতে সংযোগ বৃদ্ধিৰ ক্ষেত্ৰত নতুন পথ মুকলি কৰিছে।

ভিয়েটনামলৈও পোনপটীয়া বিমান সেৱাৰ লক্ষ্য
মুখ্যমন্ত্ৰী ড° হিমন্ত বিশ্ব শৰ্মাই ইতিমধ্যে ভিয়েটনামলৈও পোনপটীয়া বিমান সেৱা আৰম্ভ কৰাটো পৰৱৰ্তী লক্ষ্য বুলি উল্লেখ কৰিছে। এই পদক্ষেপ সফল হ’লে গুৱাহাটীৰ বিশ্বব্যাপী বিমান সংযোগ আৰু অধিক বিস্তৃত হ’ব।
অসমৰ অৰ্থনৈতিক বিকাশ, বিনিয়োগ আকৰ্ষণ আৰু বিশ্ব বজাৰৰ সৈতে সংযোগ বৃদ্ধিৰ ক্ষেত্ৰত এই বিমান সেৱা এক গুৰুত্বপূৰ্ণ মাইলৰ খুঁটি হিচাপে পৰিগণিত হ’ব বুলি বিভিন্ন মহলে মত প্ৰকাশ কৰিছে।